वेळीच व्हा वेगळे

रिलेशनशिप कधी-कधी डोकेदुखी ठरू शकतात. चुकीच्या व्यक्तीसोबतच नातं घातक तर ठरतच शिवाय तुमच्या आयुष्यावर खोलवर परिणाम करतं.

बॉलिवूडच्या रोमँटीक सिनेमांचा आपल्या मनावर इतका खोलवर परिणाम झालाय की, जर आपल्याला आनंदी राहायचं असेल तर रिलेशनशिप शिवाय पर्याय नाही असं आपल्याला वाटू लागलंय. त्यातूनच मग एखाद्याविषयी आकर्षण वाटू लागलं की आपण रिलेशनशिपची वाट धरतो. पण ही रिलेशनशिप कधी-कधी डोकेदुखी ठरू शकतात. चुकीच्या व्यक्तीसोबतच नातं घातक तर ठरतच शिवाय तुमच्या आयुष्यावर खोलवर परिणाम करतं. अशा रिलेशनशिपमधून बाहेर पडताना खालील गोष्टी लक्षात ठेवा...

चुकीच्या वागण्याचं समर्थन नको : बऱ्याचदा आपलं नातं नेमकं कसं आहे याबद्दल आपला गोंधळ उडालेला असतो. म्हणजे कधी सुदृढ वाटणारं नातं कधी फारच वाईट वळण घेतं. पण जर तुमचा जोडीदार तुम्हाला शिवीगाळ करत करत असेल, तुमचा शारीरिक किंवा मानसिक दुरूपयोग करत असेल तर वेळीच मागे फिरा. अशावेळी जोडीदाराच्या वागण्याचं समर्थन न करता हे नातं घातक आहे हे मनाशी पक्क करा. यातून बाहेर येण्यासाठी मनाची तयारी करा.


संवाद साधून मार्ग काढा : रिलेशनशिप कितीही वाईट असलं तरी चारचौघात प्रतिष्ठा राखण्यासाठी आपण खोटेपणाने वागतो. मित्रपरिवारात आणि कुटुंबियांमध्ये होणारी चर्चा टाळण्यासाठी करण्यात येणारा दिखावा संकट वाढवू शकतो. खोट्या वागण्यामुळे आपण सर्वांपासून दूर जातो. अशावेळी जिवलगांसोबत संवाद साधून मार्ग काढा.

...तर मैत्रीही घातकच : ब्रेकअप झाल्यावरही मैत्रीपुरते संबंध ठेवण्याकडे काही लोकांचा कल असतो. परंतु जर तुम्ही चुकीच्या व्यक्तीसोबत रिलेशनशिपमध्ये असाल तर अशा व्यक्ती बरोबर मैत्रीसुद्धा घातक ठरू शकते. अशी लोकं तुमच्या खासगी माहितीचा फायदा घेऊन तुम्हाला मानसिक त्रास देऊ शकतात. त्यामुळे अशा व्यक्तींपासून कायमचे संबंध तोडा.

स्वतःमध्ये चांगले बदल घडवा : बदल लगेच घडत नसतात, परंतु योग्य वेळ दिल्यास तुम्ही यातून व्यवस्थित बाहेर पडू शकता. ब्रेकअपनंतर तुम्हाला तुमचा मिस्टर/मिसेस परफेर्ट लगेच मिळणार नाही हे लक्षात ठेवा. थोड्या काळासाठी वाटणारं आकर्षण पुढे मोठं संकट ओढावून आणू शकतं. त्यापेक्षा स्वतःमध्ये चांगले बदल घडवून स्वतःची प्रगती साधा.